Este venres 6 de febreiro inaugurouse a exposición da artista Maite Bouzo no CC Lustres Rivas de Ribeira, Escolma dunha vida, que se poderá visitar ata o 28 de febreiro de xeito gratuíto de luns a sábado.
A exposición inclúe unha trintena de obras diversas onde as cores, técnica e formato se combinan para mostrar paisaxes, personaxes, bodegóns ou retratos. Óleo, pastel, acuarela e debuxo que percorren a traxectoria desta artista ourensá afincada en Corrubedo.
A exposición Escolma dunha vida, en palabras de Maite Bouzo, “pretende ser unha mostra de pintura que recolle obras realizadas ao longo da miña vida, comprendendo pezas de moitos anos diferentes e incluíndo pinturas antigas dos meus inicios na miña cidade natal de Ourense, outras correspondentes á miña época en Vigo e máis recentemente, as elaboradas aquí nesta fermosa terra nosa de natureza salvaxe e amplos horizontes”.
A alcaldesa, María Sampedro, acompañou á artista, xunta á concelleira de Cultura Ana Barreiro e outros membros da Corporación Municipal no acto no que veciños e amigos, entre os que estaban o programador municipal de exposicións Unai González e á técnica de Cultura Sara García, arrouparon a esta creadora local.
Lembraron que ata o 15 de febreiro está aberto o prazo para inscribirse na III Mostra de Mulleres Creadoras, que terá lugar dende o 5 de marzo ata fináis de abril nesta mesma sala e da que se editará un catálogo coas obras participantes. Aquelas artistas que queiran participar deberán enviar un correo electrónico a culturaefestexos@ribeira.gal con foto da peza (calquera técnica), biografía da artista, texto sobre a peza e datos técnicos ata o 15/02. Animádevos!
