A mesa de contratación do Concello de Padrón adxudicou hoxe a construción da nova escola infantil á unión temporal de empresas formada pola firma padronesa Elite e a madrileña Consvial. A UTE comprométese a executar as obras nun prazo de seis meses e cun orzamento de 789.314,31 euros, unha cifra lixeiramente inferior aos 800.000 euros inicialmente previstos polo Concello.
A proposta da mesa será ratificada o vindeiro martes pola Xunta de Goberno Local, que aprobará oficialmente a adxudicación. Ao proceso de licitación, desenvolvido con carácter público e transparente, presentáronse tamén outras catro empresas: Construcciones Iglesias Mera, Elecnor Servicios y Proyectos, Mármoles Orosa Miguel e Obras Excavaciones Construcciones Caamaño.
O alcalde, Anxo Arca, destacou positivamente que entre as empresas adxudicatarias figure unha compañía local. “Fronte ao ruído interesado, o Concello optou por seguir avanzando, con discreción e responsabilidade, cara a unha solución definitiva”, afirmou, en resposta ás críticas difundidas durante o proceso de licitación.
Arca asegurou que, unha vez finalizadas as obras, “Padrón contará cunha escola infantil do século XXI, con espazos dignos, accesibles, saudables e adaptados ás necesidades educativas actuais de crianzas, profesionais e familias”.
O rexedor lembrou tamén que a decisión do actual equipo de goberno socialista responde á “responsabilidade ineludible” de acometer a reforma integral do centro, tras os informes técnicos municipais que advertían das condicións inadecuadas do antigo edificio.
