O Club Náutico de Ribeira acolleu unha comida oficial cargada de emoción e compañeirismo con motivo da despedida do xuíz Jesús Leal Rodríguez, que finaliza a súa etapa á fronte do Xulgado de Primeira Instancia e Instrución número 1 da localidade. O acto serviu como mostra de afecto e agradecemento entre o ámbito xudicial e as forzas de seguridade pola estreita colaboración mantida durante o seu tempo na praza, unha etapa que comezou no verán de 2025.
Durante o encontro, o xefe da Policía Nacional en Ribeira, Diego Amaya, tomou a palabra para destacar publicamente a cooperación constante co maxistrado, subliñando a súa implicación, respecto institucional e traballo conxunto. Amaya valorou especialmente a coordinación que permitiu importantes resultados en materia de investigación e seguridade cidadá.
Á cita asistiron membros do grupo de Policía Xudicial, mandos e axentes de distintas unidades da Policía Nacional, así como efectivos da Garda Civil, nun ambiente de recoñecemento mutuo e compañeirismo.
Visiblemente emocionado, Jesús Leal Rodríguez agradeceu as palabras do xefe policial e lembrou a estreita colaboración e frutífera mantida cos corpos de seguridade desde a súa chegada ao xulgado. Destacou o traballo conxunto na loita contra o tráfico de drogas e na instrución de causas criminais de gran repercusión mediática, sinalando que se marcha coa “conciencia tranquila e a satisfacción do deber cumprido”.
O momento máis intenso do acto chegou ao peche da homenaxe, cando o xuíz recibiu o aplauso unánime dos presentes, poñendo fin a unha etapa caracterizada polo respecto institucional, a cooperación efectiva e o compromiso coa xustiza en Ribeira.
