Compromiso Outes denunciou hoxe a “parálise” que, ao seu xuízo, está a sufrir o Concello en materia de contratación e licitación pública despois de coñecerse os datos da Federación Galega da Construción, que sitúan nun 73,72 % a caída da licitación de obra pública municipal ao longo de 2025.
Segundo a formación, a redución da contratación “non é unha interpretación política, senón un feito obxectivo” que coincide co cambio de goberno producido tras a moción de censura de febreiro de 2025. Para o grupo, trátase dun “retroceso histórico que non admite maquillaxe nin xustificacións simplistas”.
Compromiso Outes lembra que en 2024, baixo o seu mandato, o Concello de Outes lideraba a licitación de obra pública na comarca e que, ademais, quedaron proxectos aprobados e con financiamento concedido por un importe superior aos dous millóns de euros.
A responsable da formación, Alba Quintela, asegurou que “o que estamos vendo é unha clara falta de capacidade de xestión”. Na súa opinión, “non se poden eludir responsabilidades, como fai o señor Calo, cunha caída do 73 % na contratación pública cando se deixaron máis de dous millóns de euros en proxectos financiados. O que hai é parálise”.
Quintela engadiu que “en lugar de asumir responsabilidades, o alcalde opta por escusas que non están á altura do que merece a veciñanza de Outes”. “Gobernar esixe planificación, traballo e capacidade para executar; non declaracións que intentan desviar a atención dos datos obxectivos, botando balóns fóra”, concluíu.
Desde Compromiso Outes reclaman explicacións “serias” e propostas concretas para reactivar a contratación pública e recuperar o ritmo de investimento que, segundo sinalan, o municipio mantivo durante o exercicio 2024.
