O cemiterio de Cemiterio de Boisaca acolleu este domingo o acto central das Xornadas en homenaxe aos boirenses fusilados en 1937, cunha cerimonia na que se descubreu unha placa na súa memoria. A iniciativa organizada pola Comisión pola Recuperación da Memoria Histórica do Barbanza (CRMH) contou coa participación de familiares das vítimas e representantes institucionais.
A placa lembra a Rodrigo Álvarez Gantes, Braulio Castro Gallardo, Ramón Lojo Agrelo, José Maceiras Vilasó, Santiago Miranda Lago, Juan Outeiral Outeiral, Juan Bautista Torrado Rivadulla e Gerardo Piñeiro Piñeiro, fusilados na madrugada do 23 de febreiro de 1937 e soterrados en Boisaca. O acto concíbeuse como un xesto de dignidade, reparación moral e xustiza democrática para recuperar os seus nomes e devolverlles o lugar que lles corresponde na historia.
As xornadas conmemorativas deron comezo no Pazo de Goiáns, onde o alcalde de Boiro, José Ramón Romero, inaugurou os actos. O rexedor subliñou que iniciativas deste tipo “fan saír á luz” a historia do municipio e son necesarias para que estes feitos “sexan coñecidos e recordados”, incidindo en que se trata de episodios que non deben repetirse.
Durante a mañá do sábado desenvolveuse unha conferencia histórica sobre a represión franquista na comarca do Barbanza a cargo de Antonio Míguez. Ademais, celebrouse unha sesión dedicada ás biografías dos boirenses fusilados en Boisaca e aos lugares da memoria en Boiro, guiada por Xosé Deira e Rocío L. Yáñez. As actividades completáronse cun roteiro por distintos espazos do termo municipal vinculados á memoria represiva.
O acto deste domingo en Santiago de Compostela pon o broche final a unhas xornadas que buscan fortalecer a memoria democrática, transmitir ás novas xeracións os valores de liberdade e convivencia e manter vivo o recordo das vítimas da represión franquista, estreitando tamén lazos entre Boiro e a capital galega na defensa da verdade e da xustiza histórica.
