Este venres 27 de febreiro o Auditorio Municipal de Rianxo vai ser o escenario do espectáculo Xoguetes rotos, da campañía Barrosanta, en coprodución con ButacaZero. A función, que é para maiores de 14 anos, dará comezo ás 21.00 horas e terá unha duración de arredor de 70 minutos. A entrada será de balde ata completar capacidade (con recollida de convites dende unha hora antes do comezo da función, máximo 2 por persoa)
Organiza o Concello de Rianxo ao abeiro da programación da Rede Cultural da Deputación da Coruña.
Xoguetes rotos é unha obra que nos fala da fenda íntima na memoria e na identidade. Cóntanos a historia de Mario e da descuberta de quen é realmente, transportándonos dende unha aldea da provincia de Ourense até o Vigo industrial dos anos 70. Estamos ante un relato de valentía, amizade e transformación, protagonizado por Barrosanta (Anxo Outomuro e Dani Lago) en co-produción con ButacaZero. O texto é de Carolina Román adaptado pola dramaturga e actriz rianxeira Esther Carrodeguas e por Roberto Pascual. A dirección é de Xavier Castiñeira.
