A asociación Amicos puxo en marcha na lonxa de Ribeira un singular “hospital de corais” para recuperar e devolver ao mar exemplares capturados accidentalmente pola frota pesqueira. Só en 2025 lograron reintroducir arredor de mil corais na ría de Arousa, cunha taxa de supervivencia que rolda o 95 %.
Os corais, pertencentes ao grupo dos cnidarios, son animais mariños moi delicados e dos máis antigos do planeta. “Son importantes porque forman estruturas que crean zonas de reserva e de posta para especies como os chopos, os marraxos e outras quenllas”, explica Xoán España, director da entidade.
Un proceso coidadoso na lonxa
O proxecto baséase na colaboración cos mariñeiros, que cando atopan corais nas artes de pesca os depositan nun cubo con auga de mar para trasladalos aos acuarios habilitados na lonxa. Alí comeza o proceso de rehabilitación.
Devolvelos directamente á auga non garantiría a súa supervivencia, xa que precisan caer de pé para poder alimentarse. Preto dun cento de usuarios da asociación encárganse de preparar pedras que sirvan de soporte e de fragmentar as colonias para multiplicalas, xa que en cada ramificación viven numerosos pólipos.
Traballan principalmente con dúas especies: Leptogorgia lusitanica (rosada) e Eunicella verrucosa (branca), aínda que tamén teñen rexistrado exemplares de Leptogorgia viminalis, de cor amarela. Unha vez fixados ás pedras, os corais permanecen en depósitos con auga mariña ata que chega o momento da súa solta.
Repoboación controlada e seguimento
A devolución ao mar realízase en colaboración coa confraría de Aguiño, con soltas marcadas por zonas para favorecer a repoboación progresiva. O seguimento inclúe mergullos periódicos para comprobar a evolución dos exemplares.
O proxecto, denominado CaBalGa —activo tamén en Cataluña e Baleares— desenvolve en Galicia as actuacións no Parque Nacional das Illas Atlánticas de Galicia, onde neste primeiro ano de andaina se reintroduciron preto de mil corais.
“A taxa de crecemento é bastante alta e pode volver crear un individuo completamente formado a partir dun fragmento”, explica Lucía Jiménez, bióloga mariña e docente da asociación.
Desde o sector marisqueiro valoran a iniciativa como unha forma de compensación ambiental. “É devolverlle ao mar o que nos achega. Dános peixe e pesca, e nós temos que compensalo con algo, neste caso con inclusión social e devolvéndolle ao medio na medida do posible”, sinala Manuel Reiriz, presidente da agrupación de mariscadores de Carreira e Aguiño.
A iniciativa combina así conservación mariña, colaboración co sector pesqueiro e inclusión social, convertendo a lonxa de Ribeira nun referente na recuperación destes ecosistemas fundamentais para a biodiversidade das rías galegas.
