A directora xeral de Desenvolvemento Pesqueiro, Ángeles V. Suárez, reuniuse hoxe cos patróns maiores das confrarías de Noia, Muros, Porto do Son e Portosín para avaliar a situación actual dos bancos marisqueiros da zona e procurar solucións conxuntas que dean resposta ás necesidades do sector.
Durante o encontro, Suárez reiterou o compromiso do Goberno galego de manter un contacto directo e permanente cos profesionais do mar, co obxectivo de coñecer de primeira man a evolución dos recursos e valorar as actuacións necesarias para favorecer a súa recuperación e sustentabilidade.
A responsable autonómica lembrou que a pasada semana xa tivo lugar en Santiago unha reunión coa conselleira do Mar, Marta Villaverde, e representantes das federacións de confrarías para facer seguimento da situación derivada dos recentes episodios meteorolóxicos adversos e analizar o seu posible impacto nos bancos marisqueiros.
A directora xeral explicou tamén que a Consellería do Mar realiza un control exhaustivo da evolución dos bancos a través dos sistemas de monitorización ambiental dispoñibles, que permiten medir parámetros como a salinidade, temperatura, pH e outros factores determinantes para a supervivencia dos moluscos bivalvos.
Este seguimento técnico complétase co traballo continuo do persoal investigador e dos servizos técnicos da Administración autonómica, que avalían constantemente o estado dos recursos para anticipar riscos e aplicar, de ser preciso, as medidas máis axeitadas que garantan a viabilidade do marisqueo e a actividade económica asociada.
