O Concello de Porto do Son está a desenvolver actividades participativas coa veciñanza enmarcadas no seu Programa de Promoción da Saúde, organizado pola Rede Galega de Promoción da Saúde en colaboración coa Administración local, co obxectivo de fomentar os hábitos de vida positivos na poboación, en áreas como a actividade física, a alimentación e o benestar emocional.
No marco deste programa, o pasado venres 30 de xaneiro levouse a cabo unha xornada participativa con exercicios de calidade, acompañada dun almorzo saudábel e nutritivo.
O Concello de Porto do Son engadiu que seguen abertas as inscricións para que a veciñanza tire proveito dos recursos e nocións compartidos nas sesións, a través do Departamento de Deportes de Porto do Son (981 76 75 89 e deportesdoson@gmail.com).
As actividades desenvólvense de novembro de 2025 a abril de 2026.
O programa comezou o 14 de novembro no Club de Xubilados cunha sesión informativa sobre conceptos básicos e recomendacións de actividade física no adulto maior.
