A Policía Local de Rianxo emitiu un comunicado no que sinala que xa foi identificado grazas ás cámaras de seguridade o suposto autor dos furtos recentes levados a cabo estes últimos días en supermercados e noutros establecementos da localidade de Rianxo, nos cales presuntamente estaría implicado un varón de 43 anos, que conta con antecedentes por delitos contra o patrimonio e outros ilícitos penais.
“Este individuo xa puido ser identificado e localizado tras a comisión dalgún destes feitos, sendo recuperados os produtos que portaba nese momento”, sinalaron os axentes, engadindo que “polos feitos acontecidos xa se instruíron dilixencias por presuntos delitos leves de furto, para seren remitidas ao Xulgado para a súa tramitación”.
No comunicado a Policía Local recorda que está a intensificar o seu labor preventivo e a incrementar a presenza de axentes nas rúas co obxectivo de disuadir este tipo de feitos e reforzar a seguridade no comercio. O obxectivo de informar desta situación, sinalan, “e contribuír a que os comerciantes adopten as medidas preventivas que consideren oportunas e, no caso de seren vítimas dalgún feito semellante, presenten a correspondente denuncia, xa que isto é fundamental para continuar coas actuacións policiais e xudiciais correspondentes”. Así mesmo, advirten de que a adquisición de produtos de dubidosa procedencia, cando se coñeza ou se poida sospeitar a súa orixe ilícita, “pode constituír un presunto delito de receptación”.
