A Deputación da Coruña, en colaboración co CITIC – Centro de Investigación TIC da Universidade da Coruña, impulsa un programa educativo pioneiro sobre intelixencia artificial xenerativa dirixido ao alumnado de 4º da ESO e 1º de Bacharelato en 20 centros educativos da provincia.
Segundo informou a institución provincial, “a iniciativa ten como obxectivo achegar coñecementos básicos e competencias clave sobre unha das tecnoloxías máis transformadoras da actualidade, combinando contidos teóricos cun enfoque eminentemente práctico”.
As sesións desenvólvense en aulas con computadores para o alumnado e permitirán aos estudantes comprender o funcionamento da IA xenerativa, coñecer aplicacións actuais como ChatGPT, Gemini ou HuggingChat, e reflexionar sobre o seu uso ético, seguro e responsábel, informaron as dúas entidades, engadindo que o programa tamén porá o foco no potencial da IA na creación de contidos dixitais (imaxe, audio e vídeo) e analizará os retos e oportunidades que estas ferramentas presentan nos ámbitos educativo, social e profesional.
Haberá sesións en IES de Muros, Boiro e Ribeira ao longo dos seguintes meses.
A deputada de Educación, Yoya Neira, destacou que “a intelixencia artificial xa forma parte da realidade cotiá da nosa mocidade, polo que é fundamental que desde as institucións públicas promovamos unha formación crítica, rigorosa e adaptada aos novos tempos”.
Neira subliñou que “non se trata só de aprender a usar ferramentas, senón de entender como funcionan, que implicacións teñen e como empregalas con responsabilidade ”.
A deputada incidiu ademais en que “este programa contribúe a democratizar o acceso ao coñecemento tecnolóxico, garantindo que o alumnado, viva onde viva, teña as mesmas oportunidades para formarse en competencias dixitais avanzadas e reducir así a fenda dixital”.
Dúas sesións por centro e ampla cobertura territorial
O programa estrutúrase en dúas sesións formativas por centro, cunha duración de dúas horas cada unha. As actividades comezaron o pasado 9 de febreiro no IES Agra do Orzán (A Coruña) e estenderanse durante os meses de febreiro, marzo e abril en centros urbanos e rurais da provincia.
As sesións desenvolveranse nos seguintes centros:
Febreiro
IES Agra do Orzán (A Coruña): 9 e 23 febreiro
IES Ferrol Vello (Ferrol): 11 e 25 febreiro
IES Ortigueira (Ortigueira): 20 e 27 febreiro
IES Isidro Parga Pondal (Carballo): 23 e 26 febreiro
IES As Insuas (Muros): 23 e 27 febreiro
IES Concepción Arenal (Ferrol): 24 febreiro e 3 marzo
IES Fene (Fene): 24 febreiro e 3 marzo
Marzo
IES Elviña (A Coruña): 3 e 4 marzo
IES Praia Barraña (Boiro): 4 e 13 marzo
IES Terra de Soneira (Vimianzo): 27 febreiro e 6 marzo
IES Sar (Santiago de Compostela): 5 e 19 marzo
IES Blanco Amor (Culleredo): 18 e 25 marzo
IES Eduardo Pondal (Ponteceso): 23 e 25 marzo
IES Mariñas (Betanzos): 24 e 27 marzo
Abril
IES nº 1 Ribeira (Ribeira): 7 e 10 abril
IES Manuel Murguía (Arteixo): 7 e 14 abril
IES Xulián Magariños (Negreira): 15 e 17 abril
IES María Casares (Oleiros): 15 e 17 abril
IES Cabo Ortegal (Cariño): 20 e 27 abril
