A Deputación da Coruña publicou a licitación das obras de mellora da capa de rodaxe da estrada DP-6202, que vai de Outes ata a AC-400 por Valadares.
O proxecto ten un orzamento de 529.430,76 euros, destinados á renovación da pavimentación do tramo comprendido entre os puntos quilométricos 0+358 e 4+498. As actuacións contempladas abranguen os traballos de preparación da vía, como a limpeza das beiravías, a roza das marxes, a apertura de cunetas e poda de árbores, e a execución de varios tramos de dique en zonas con desprendementos de noiros entre os puntos 3+105 e 3+350.
Unha vez acondicionado o treito, procederase á súa pavimentación, así como á reposición das marcas viarias do eixo, dos bordos e das inscricións. A sinalización vertical, o balizamento e os elementos de defensa necesarios tamén serán instalados de novo na vía.
A Deputación explicou que este proxecto “súmase ao resto de obras de mellora viaria que está a executar a entidade provincial durante o exercicio 2026, atendendo ás necesidades e demandas dos concellos da provincia da Coruña”. Esta liña de actuación ten como “fin mellorar a seguridade viaria, tanto para o tránsito de vehículos como para os peóns”. O prazo de presentación das ofertas está aberto e estenderase ata o 11 de marzo.
