A Consellería do Mar non quere que a anguía sexa declarada en perigo de extinción polo Goberno (dende a Xunta din que non hai evidencias de devalo na poboación desta especie, e dende o Ministerio para a Transición Ecolóxica e o Reto Demográfico esgrimen que si que as hai e que cómpre pór en práctica medidas restritivas que a protexan).
A conselleira do Mar, Marta Villaverde, co obxectivo de trasladar os seus argumentos ao sector, mantivo este mércores 11 de febreiro unha reunión coas confrarías afectadas pola proposta do MITECO para incluír a anguía no listado de especies en perigo de extinción, unha decisión que en palabras da conselleira, implicaría a prohibición da súa pesqueira.
A titular de Mar explicou que foi a propia Xunta quen trasladou ao sector a convocatoria da Comisión estatal de Flora e Fauna na que se abordará esta cuestión, iniciando así unha rolda de contactos coas entidades máis representativas da actividade en Galicia. Neste sentido, lembrou que na comunidade existen tres plans de explotación específicos —nas rías de Vigo, Arousa e Ferrol— que afectan directamente a confrarías como as de Arcade, Carril e Ferrol, nas que hai embarcacións que dependen en exclusiva desta pesqueira.
Villaverde subliñou que “o sector realizou nos últimos anos un importante esforzo de adaptación ás esixencias normativas, con medidas cada vez máis restritivas que inclúen ampliación dos períodos de veda, limitación dos días de actividade e establecemento de cotas de captura”.
Segundo explicou, “o control e monitoraxe da actividade demostran que o recurso está a ser xestionado en Galicia de maneira responsábel e sustentábel”.
A titular de Mar dixo tamén que “a proposta estatal implicaría unha prohibición circunscrita a España mentres outros países da Unión Europea poderían continuar explotando este recurso, o que xeraría unha situación de clara desvantaxe competitiva para o sector galego”.
Amais, incidiu en que a sustentabilidade “debe abordarse desde unha visión integral que teña en conta non só a dimensión ambiental senón tamén a social e económica, especialmente en territorios costeiros onde esta actividade constitúe unha fonte de emprego e fixación de poboación”.
Engadiu que “a iniciativa estatal se retome sen novos informes técnicos que a avalen e recordou que propostas semellantes xa foron rexeitadas anteriormente polo conxunto das comunidades autónomas”.
A Consellería do Mar presentou alegacións formais á proposta do MITECO, nas que solicita “a retirada da declaración de especie en perigo de extinción e reclama que calquera decisión se basee en informes científicos actualizados, nunha análise diferenciada por territorios e nun proceso real de diálogo coas comunidades autónomas e co propio sector”.
