A Concellería de Promoción Económica da Pobra do Caramiñal e a empresa local CONGALSA, referente galego e estatal en alimentación, fixeron entrega na mañá deste xoves 5 de febreiro da viaxe familiar a Eurodisney a Iván Fidalgo Boo, gañador do sorteo realizado no marco da campaña comercial de Reis, posta en marcha para dinamizar o comercio local durante estas datas.
A concelleira responsábel desta área, Amparo Cerecedo, destacou “o éxito da campaña, na que participaron máis de 40 establecementos comerciais da Pobra e na que se repartiron uns 4.500 pasaportes”.
Ao mesmo tempo, sinalou, “proporcionamos a oportunidade a unha familia de viaxar a Disneyland París e mergullarse de cheo na maxia que caracteriza ao parque”.
Ademais, a edil tamén agradeceu a colaboración de CONGALSA, que asumiu o financiamento do premio, e puxo en valor “a importancia da cooperación para impulsar accións que repercutan directamente no noso comercio”.
Pola súa banda, Irene Souto, adxunta á dirección de Relacións Institucionais da compañía alimentaria, destacou que “para CONGALSA xa é unha tradición colaborar nesta iniciativa, xa que brindar o noso o apoio ao tecido comercial local e á sociedade son piares fundamentais” e felicitou “ao agraciado por esta experiencia, que desexo que desfrute ao máximo”.
