As Rías Baixas e a comarca de Santiago afrontarán este xoves unha xornada marcada pola inestabilidade meteorolóxica derivada da borrasca Leonardo, situada ao oeste de Irlanda, que enviará cara a Galicia unha fronte fría activa nas primeiras horas do día.
Prevese unha mañá con ceos moi nubrados e chuvias persistentes, localmente fortes, que poderán vir acompañadas de aparello eléctrico e sarabia. Pola tarde, as precipitacións darán paso a episodios de chuvascos intermitentes, sen descartar treboadas puntuais.
A cota de neve situarase ao final do día arredor dos 1.100 metros, con descensos puntuais que poderían afectar ás zonas de montaña do interior da provincia de Pontevedra. As temperaturas mínimas experimentarán un lixeiro ascenso, mentres que os valores máximos se manterán sen cambios significativos.
Os ventos do suroeste soprarán fortes en xeral, con refachos moi fortes no litoral das Rías Baixas e en zonas altas do interior, o que podería complicar a circulación en estradas costeiras e accesos ás montañas.
O noso mar: vento do sudoeste, forza 5 a 7 á mañá e á tarde e 6 a 7 á noite. Media vaga. Visibilidade regular. Mar de fondo do oeste, con ondas de 4 a 4.5 metros á mañá e 2.5 a 3.5 metros á tarde e á noite.
