O sol acompañou ás familias dos 21 falecidos no afundimento, vai catro anos do pesqueiro de Marín Villa de Pitanxo. Foi na homenaxe que, para as vítimas do naufraxio deste buque rexistrado o 15 de febreiro de 2022 en augas de Terranova, se celebrou onte, sábado, en Marín, organizado polas familias dos náufragos. Un funeral en demanda dunha xustiza que xa debería terse aplicado por máis que se tenten xustificar as moitas irregularidades rexistradas nesta marea do barco de Pesquerías Nores.
Unha homenaxe sentida, necesaria e sinxela: unha ofrenda de flores, unha misa e un silencio que doía porque, como dixo o Defensor do Pobo, Ángel Gabilondo, presente no acto, na dor pouco se pode dicir para xustificar os motivos “para traballar e lo¡tar en defensa da verdade”.
É necesaria a verdade que, supostamente, se oculta, relativa a que foi o que pasou a bordo do Villa de Pitanxo naquela infausta noite que marcou un antes e un despois na conciencia colectiva da familia mariñeira. Canto se calou, como se ocultou boa parte do acontecido durante o sinistro e, posteriormente, como se disfrazaron os feitos para xustificar o inxustificable.
A decisión da Audiencia Nacional de enviar a xuízo ao patrón do barco e os administradores da empresa armadora por homicidio por imprudencia grave e un delito contra os dereitos dos traballadores abre novas posibilidades de afondar nos por que de tanto silencio diante da insistente reclamación de verdade e xustiza.
