A Coruña acolleu este mércores, 4 de febreiro, a presentación do libro As Rimas populares de Galicia de Manuel Murguía, do investigador Diego Rodríguez González, unha publicación que ve a luz coincidindo co cabodano do célebre escritor e historiador coruñés.
O acto celebrouse na Casa Museo Casares Quiroga e contou coa participación do concelleiro de Cultura e Turismo da Coruña, Gonzalo Castro, do autor, e do presidente da Real Academia Galega (RAG), Henrique Monteagudo. O Concello colabora con esta edición xunto á institución académica.
Durante a presentación, Castro destacou que “un dos compromisos culturais da alcaldesa coruñesa, Inés Rey é poñer en valor o traballo dos grandes autores e autoras galegas, colaborando con institucións como a RAG para achegar o seu legado á cidadanía”.
A obra recupera un proxecto editorial inacabado de Manuel Murguía, quen non chegou a publicar en vida as súas Rimas populares de Galicia. O escritor traballou durante anos nesta recompilación de textos da tradición oral, recollidos a través de colaboradores e correspondentes, sen realizar traballo de campo directo. A súa intención era inserilos no amplo contexto bibliográfico e histórico da cultura popular europea.
Os materiais sobre os que se basea o estudo de Rodríguez avanzaron ata un momento de redacción moi desenvolvido e chegaron a dispoñerse para a imprenta, aínda que nunca se materializou a edición. Parte destes textos foron conservados en versións parciais por Lois Carré, Florencio Vaamonde e nas poucas páxinas autógrafas que se gardan entre os fondos da Real Academia Galega e da Fundación Barrié.
Segundo o autor, este legado —“cuestionado en múltiples ocasións, pero indubidablemente auténtico”— é fundamental para afondar no coñecemento da poesía popular galega e mesmo para revisar os esquemas aceptados do romanceiro hispánico e da tradición oral europea.
