Un varón resultou ferido de consideración na tarde deste sábado tras producirse un estoupido de gas nunha vivenda situada nun edificio de dúas plantas da rúa de Vista Alegre, en Santiago de Compostela. A persoa sufriu queimaduras e foi trasladada ao Hospital Clínico de Santiago.
O estoupido afectou tamén aos edificios lindeiros, que tiveron que ser desaloxados de maneira preventiva. O 112 Galicia recibiu aviso do suceso dez minutos antes das 19.00 horas, cando varios particulares alertaron dunha explosión no inmoble e da posible existencia de persoas feridas, así como de danos noutros edificios próximos.
Nada máis recibir a alerta, mobilizáronse de inmediato os Bombeiros de Santiago, Urxencias Sanitarias de Galicia-061 —que desprazaron varias ambulancias—, a Policía Local e Nacional, así como efectivos da Agrupación de Voluntarios de Protección Civil. Tamén foron informados os técnicos das empresas subministradoras de gas da zona.
Unha vez no lugar, Bombeiros e Policía confirmaron o estoupido e a existencia dun varón ferido con queimaduras. Os servizos de emerxencia continúan traballando na zona e, segundo as primeiras hipóteses, o suceso podería deberse ao estoupido dunha bombona de gas, aínda que as causas exactas están aínda pendentes de esclarecer.
