UCIN Boiro emitiu un comunicado, a través do seu responsábel local Miguel Piqueras, no que critica o emprazamento da marquesiña de bus de Cimadevila por considerala “inútil” para a cidadanía. Trátase, engade a agrupación, “dunha infraestrutura financiada con diñeiro público que non cumpre a súa función básica de protexer os usuarios da choiva e o vento”.
E engade Piqueras: “Cada día de choiva, os nenos e nenas que agardan polo transporte escolar acaban enchoupados”. Desde a formación din que o alcalde comprometeuse publicamente a solucionar esta situación, “pero que os veciños non recibiron nin solucións nin explicacións”. Dende UCIN engaden que “existen outras marquesiñas no municipio, tanto no centro como no rural, que presentan deficiencias similares, o que demostra un grave problema de planificación e mantemento”, sinala o coordinador, apuntando que “a solución é sinxela e de baixo custo, baseada simplemente en corrixir a orientación das estruturas”. E conclúen: “Non falamos de grandes obras, falamos de traballar e de asumir responsabilidades”.
