O mércores 14 presentarase inestable nas Rías Baixas e na comarca de Santiago, nunha xornada marcada pola situación intermedia de Galicia entre as altas e as baixas presións. Durante as primeiras horas do día agárdanse ceos moi nubrados, con chuvascos intermitentes que poderán afectar tanto á costa como ao interior.
Co avance da xornada, o tempo tenderá a mellorar especialmente nas Rías Baixas, onde se irán abrindo claros a partir do mediodía. En Santiago, a evolución será algo máis lenta, aínda que tamén se prevé unha diminución das precipitacións cara á tarde.
As temperaturas experimentarán un lixeiro descenso, mantendo un ambiente fresco para a época (6 a 14 graos).
No que respecta ao vento, soprará do noroeste pola mañá, con intensidade moderada no litoral das Rías Baixas, para ir virando progresivamente a suroeste. En puntos expostos como Fisterra poderán rexistrarse refachos fortes ao longo do día.
O noso mar; Vento do norte á mañá, do oeste á tarde e do sudoeste á noite, forza 4 a 5 á mañá, 1 a 3 á tarde e 4 a 6 á noite. Forte marusía á mañá e á noite e mar ovellado á tarde. Visibilidade boa. Mar de fondo do noroeste, con ondas de 3 a 3.5 metros á mañá e 2 a 2.5 metros á tarde e á noite.
