A vila de Rianxo celebrou este domingo 11 de xaneiro a Homenaxe Nacional a Daniel Castelao organizada polo Bloque Nacionalista Galego: un acto onde o Auditorio Municipal rianxeiro quedou pequeno para lembrar ao pai do nacionalismo.
Interviron a portavoz do BNG Rianxo, Sarela Betanzos; a deputada no Parlamento de Galiza, Rosana Pérez; e a portavoz nacional, Ana Pontón.
A celebración tivo lugar no día no que se cumpren 76 anos do seu pasamento e comezou coa reencarnación do político na pel do intérprete Lucho Penabade. Ata alí mobilizáronse persoeiros de todo o país para lembrar a obra do referente do nacionalismo galego por excelencia.
Na sala principal do Auditorio respiráronse mensaxes antiimperialistas e referentes ao dereito da autodeterminación do noso país Galiza, que conectaron a vida e obra de Castelao coa máxima actualidade política.
A portavoz nacional do BNG, dirixeuse ao público alí presente para lembrar ao que foi o primeiro presidente da república no exilio: “Castelao é un faro, unha grandiosa referencia ética, social, política e artística para o noso país e o mundo. Por iso cómpre estar alerta de quen pregoa un Castelao fóra de ideoloxías.”
A choiva non parou a forza militante que se achegou ata o busto de Castelao situado no Paseo da Ribeira para depositar a ofrenda floral habitual con máis de 400 cravos.
