O Goberno central e o sector pesqueiro acordaron flexibilizar a aplicación do novo Regulamento europeo de Control da Pesca co obxectivo de facilitar o seu cumprimento por parte da frota. O acordo produciuse nunha xornada marcada pola paralización da actividade pesqueira e o peche das lonxas en todo o Estado.
O Ministerio competente adoptará con carácter urxente unha resolución pola que os erros ou omisións na estimación das cantidades rexistradas no diario de bordo para capturas inferiores a 50 quilos por especie non se considerarán infracción, sempre que a declaración de desembarque recolla correctamente as cantidades por especie.
A Secretaría Xeral de Pesca dará instrucións específicas aos servizos de inspección e control para garantir a aplicación desta resolución. Ademais, España solicitará á Comisión Europea unha modificación do regulamento para que este tipo de erros non sexan considerados incumprimentos. Mentres non se tramite ese cambio normativo, o Goberno pedirá tamén a modificación do anexo correspondente co fin de evitar que estas situacións se tipifiquen como infracción grave.
Esta proposta será trasladada ao próximo Consello de Ministros de Agricultura e Pesca da Unión Europea, previsto para o 26 de xaneiro en Bruxelas.
No relativo á anotación das capturas por operación de pesca, a obriga considerarase cumprida cando a información se facilite polo menos unha vez ao día, antes da entrada a porto ou no lugar de desembarque. En canto á notificación previa de chegada a porto, establecerase que se realice no momento no que o buque poña rumbo a porto, polo que o prazo poderá ser inferior ás catro horas recollidas no regulamento. Esta previsión non se aplicará nos casos con prazos específicos nin nos buques sometidos a obrigas concretas de preaviso.
Mobilizacións e paralización da frota
O sector comprometeuse a colaborar na aplicación destas medidas e acordou celebrar unha nova reunión para avaliar a súa execución. O encontro coincidiu cunha xornada de mobilización xeral do sector pesqueiro, na que as frotas non saíron faenar e as lonxas permaneceron pechadas como mostra de rexeitamento ás novas medidas de control impostas pola Unión Europea.
Os pescadores advertiron do impacto da normativa comunitaria e da súa aplicación nos últimos anos, alertando da falta de rendibilidade, da caída do consumo e das dificultades crecientes para manter a actividade.
