O espectáculo teatral Nanai da China, da compañía Pérez&Fernández e da produtora Urdime (gañadora do Premio María Casares á mellor montaxe de monicreques en 2024), vai recalar en Outes o vindeiro sábado 24 de xaneiro na Casa da Cultura, a partir das 1900 horas.
Nanai é unha nena que naceu unha noite sen lúa. Os seus veciños e veciñas rexéitana dende que nace, por pura superstición. Ela só sabe dicir que non, e axudar ao seu avó a cultivar o arroz máis delicioso desta beira do Yangtsé en compañía de Chispúm, un simpático búfalo de auga. Para loitar contra a estúpida superstición da xente, Nanai e o seu avó elaboran un plan que non sae todo o tempo tan ben como debería…
Nanai da China é un espectáculo de teatro onde as marionetas e os actores se fusionan para representar este conto orixinal cheo de maxia, aventuras, e humor.
Para público infantil e familiar (maiores de 5 anos).
O prezo da entrada será de 4 € (1,50 € para persoas con carné xove, menores de 12 anos, maiores de 65 anos e en situación de paro).
Entradas á venda na Casa da Cultura e en bandoticket.com.
Texto orixinal Xabier Romero
Adaptación e dirección Victoria Pérez
Elenco Victoria Pérez, Manu Fernández
Produción Pérez&Fernández
