O Concello da Pobra do Caramiñal aprobou destinar os 552.204 euros do POS+2026 da Deputación da Coruña a gasto corrente para garantir o correcto funcionamento de servizos básicos para a veciñanza. Na sesión plenaria ordinaria celebrada na mañá deste 29 de xaneiro a corporación municipal acordou tamén reservar os 221.766,83 euros correspondentes ao Plan Complementario 2026 para a remodelación e modernización do parque infantil do Castelo.
Segundo explicou o Goberno local, “a actuación permitirá renovar e actualizar os elementos existentes, mellorando a área de xogos e ampliando a súa capacidade, así como a diversidade de xogos dispoñíbeis”.
O proxecto pon especial atención na incorporación de novos elementos sen barreiras e nun deseño máis atractivo e inclusivo, pensado para un amplo rango de idades.
O Concello engadiu que “a intervención contempla tamén a reorganización e integración do mobiliario urbano e dos servizos da contorna, co obxectivo de reforzar este espazo como punto de encontro, socialización e desfrute ao aire libre, nunha zona moi frecuentada e valorada pola veciñanza e polas persoas visitantes, e que forma parte dos atractivos do centro do concello”.
Así mesmo, renovarase o pavimento amortiguador de caucho continuo en toda a superficie da área de xogos, mellorando as condicións de confort e seguridade.
Dende o Executivo sinalaron tamén que “dada a súa localización próxima ao tránsito rodado, prevese tamén a instalación dun valado de madeira nos accesos para reforzar a protección das persoas usuarias”.
A actuación completarase cun novo conxunto de bancos modulares de formigón prefabricado, que contribuirán a facer do parque un espazo máis cómodo e funcional.
Modificación de designación de dedicacións
O pleno deu luz verde á modificación de designación de dedicacións pola que o alcalde, José Carlos Vidal, asumirá a área de Deportes. Tal e como anunciaron o rexedor e o que era o edil da área ata o momento, Eloy Sobrido, a decisión está motivada por “falta de tempo”, xa que a Concellería de Deportes require unha dedicación moi elevada e unha presenza constante, algo que cualificaron como “moi difícil de compatibilizar” coa dedicación parcial de Sobrido.
