Esta fin de semana, o venres 23 e o sábado 24 de xaneiro, o Centro Arqueolóxico do Barbanza (Neixón, Boiro) vai acoller unha cita participativa dirixida ás familias: Viaxa ao pasado con Navia. Celebrarase polas mañás e pola tarde, con horario de 10.00 a 14.00 horas, e de 16.30 a 18.30 horas.
Segundo explican dende o centro, trátase dunha actividade destinada á rapazada e ás familias para desfrutar do museo en familia e achegar aos mais pequenos a prehistoria dun xeito lúdico e divertido.
Incluirá a elaboración dun gran caderniño colectivo (unha proba piloto) para recoller as opinións da cativada e dos maiores con vistas a recadar as súas opinións e suxestións e mellorar o servizo do Centro Arqueolóxico do Barbanza.
“Sabemos que moitas veces as familias visitan os museos xuntas, e que a maior parte dos contidos están pensados para público adulto. Por iso estamos a desenvolver un caderniño de actividades e xogos para que nenas e nenos poidan explorar o museo de maneira divertida, autónoma e ao seu propio ritmo”, informan dende a dirección do centro.
