Os concellos da nosa comarca seguen a colaborar co Centro Dramático Galego e o seu programa de visitas á súa sede en Santiago, o Salón Teatro (o programa Sobes ao bus do teatro?). Este venres 9 de xaneiro, a veciñanza de Boiro, Rianxo, Dodro e Rois terá a oportunidade de asistir á representación de Memorias dun neno labrego, a nova produción do CDC e Contraproducións. O bus parará ás 15.15 en Boiro, na Casa da Cultura, e ás 15.30 en Rianxo, fronte ao Auditorio.
En Dodro recalará ás 15.50 na praza do Concello, e en Rois ás 16.10 diante do Consistorio, tamén.
A función dará comezo ás 18.00 horas no Salón Teatro. O prezo, 5 euros. As prazas serán limitadas, e requírese reserva.
Memorias dun neno labrego é un espectáculo baseado na obra emblemática de Xosé Neira Vilas. Dirixido por Cándido Pazó, Memorias dun neno labrego recupera a figura de Balbino, un personaxe clave da literatura galega contemporánea, para levar á escena unha serie de lembranzas que forman parte da memoria colectiva dunha Galicia rural marcada polo traballo, os silencios, as inxustizas sociais e os soños truncados. A montaxe, producida polo Centro Dramático Galego e Contraproducións, conta cun elenco formado por Xúlio Abonjo, Santi Romay, Manuel Cortés, Federico Pérez Rey, Iris Darriba, Mónica García e Ana Santos, e combina emoción, humor e unha relación directa co público para achegar esta historia a novas xeracións.
