O Auditorio do Centro Cultural e Xuvenil de Muros acollerá o sábado 24 de xaneiro, ás 20:30 horas, a representación de Os dous de sempre, unha peza teatral de Producións Teatrais Excéntricas protagonizada por Mofa e Befa, dúo integrado por Evaristo Calvo e Víctor Mosqueira, xunto a Josito Porto.
O espectáculo recupera as emblemáticas personaxes creadas por Castelao, Pedriño e Rañolas, dous amigos tan diferentes como inseparables que constitúen unha das parellas máis recoñecidas da tradición humorística galega. Un deles é un soñador idealista e arriscado; o outro, un materialista prudente e pragmático. Xuntos representan a oposición clásica entre corpo e alma, estómago e corazón, presente en numerosas duplas da literatura e do humor universal.
A concelleira de Cultura, Caridad González, destacou que Os dous de sempre é unha oportunidade magnífica para achegar ao público unha das obras máis representativas de Castelao desde o humor e a escena, da man de dúas figuras fundamentais do teatro galego como Mofa e Befa”. Ademais, subliñou que este espectáculo “abre a programación de artes escénicas do primeiro semestre de 2026 no auditorio, reforzando a aposta do Concello por unha oferta cultural estable, de calidade e con identidade propia”.
A función está recomendada para público maior de 13 anos e terá un prezo de entrada de 4 euros. As entradas poden adquirirse a través da billeteira electrónica do Concello de Muros e nas oficinas do Centro Cultural e Xuvenil de Muros.
