A Consellería do Mar fixo balance da súa actividade de apoio e impulso ás cooperativas pesqueiras. Segundo fixo saber, executouse o 100 % do importe da convocatoria do 2025 para a preparación e aplicación dos plans de produción e comercialización das organizacións de produtores pesqueiros (OPP), executados no 2024, cofinanciadas co Fondo Europeo Marítimo de Pesca e de Acuicultura (FEMPA).
Concretamente, máis de 2,3 millóns de euros que permitiron subvencionar estas accións, dirixidas a perfeccionar a actividade extractiva, a produción dos distintos recursos mariños e o impulso da pesca artesanal, tanto en termos de innovación como de xestión sustentábel.
Estes apoios distribuíronse do seguinte xeito: Organización de Produtores de Pesca Fresca do Porto de Vigo (OPP-4) 492.178 euros; Organización de Produtores Pesqueiros Porto de Burela (OPP-7) 395.849 euros; Organización de Produtores de Pesca Fresca do Porto de A Coruña (OPP-13) 107.033 euros; Organización de Produtores de Marisco e Cultivos Mariños da Provincia de Pontevedra (OPP-20) 109.546 euros; Organización de Produtores Porto de Celeiro (OPP-77) 281.859 euros; Acerga (OPP-82) 273.436 euros; Sociedade Cooperativa Galega do Mar Santa Uxía, Organización de Produtores Pesqueiros (OPP-83) 121.710 euros; Asociación Empresarial Parquistas de Carril (OPP-89) 365.812 euros; e Organización de Produtores Pesqueiros de Noia (OPP-95) 176.031 euros.
2ª convocatoria
Trátase da segunda convocatoria no marco do FEMPA desta liña de axudas que pon en marcha a Consellería do Mar, consolidando a estas entidades como unha ferramenta clave para que o sector gañe en competitividade e un mecanismo estratéxico para a estabilización dos mercados.
Xunto coa da anualidade anterior, o investimento total por parte do Goberno autonómico supera os 4,8 millóns. Uns apoios que permitiron custear estes plans que inclúen, entre outras medidas, un programa de produción para as especies capturadas ou criadas, unha estratexia para adaptar a cantidade, calidade e presentación da oferta ás esixencias do mercado e medidas preventivas especiais de adaptación da oferta para as especies que presentan dificultades de comercialización durante o ano.
Ademais, recollen outras medidas establecidas na Organización Común de Mercados de cara á sustentabilidade pesqueira como aquelas que axuden a fomentar as actividades pesqueiras viables e sustentables, evitar e reducir as capturas non desexadas das poboacións comerciais, axudar á eliminación da pesca ilegal, non declarada e non regulamentada e a mellorar a introdución no mercado dos produtos da pesca e da acuicultura.
