Na mañá deste mércores 14 de xaneiro levouse a cabo o novo pleno da Mancomunidade Barbanza Arousa (integrado por Ribeira, A Pobra, Rianxo e Boiro), no que se realizou o cambio anual de presidencia. Julián Bustelo, alcalde de Rianxo, despois de ter exercido a presidencia durante o ano 2025 destacou “a gran implicación dos 4 concellos para levar a cabo obxectivos tan importantes coma a ampliación das competencias de Mancomunidade e a execución de parte dos fondos Next Generation”.
Balance
Dende a xerencia da Mancomunidade explicaron que no ano 2025, liderado por Julián Bustelo, cumpriuse o reto histórico entidade supramunicipal de ampliar as súas competencias a outros eidos ademais da xestión turística; como son a recollida e tratamento de residuos, recollida e protección de animais e o mantemento e limpeza de vías e espazos públicos entre outros. Tamén se executou un proxecto de Destinos Turísticos Intelixentes, leváronse a cabo avances na cooperación público – privada e comezou a execución do PSTD Viaxe a través dos sabores.
Desafíos para 2026
Este ano 2026 comeza coas tarefas de poñer en marcha as novas liñas de traballo mancomunadas e o remate do Plan de Sostibilidade Turística, dotado con 1,5 millóns de euros. Con cargo a este plan estanse levando a cabo diferentes actuacións para que o visitante poida mergullarse no pasado e no presente da enogastronomía de Barbanza Arousa.
A creación dos museos da conserva e da salgadura, a realidade aumentada no Barrio dos Cataláns, a creación de aulas enogastronómicas; así coma rutas que vinculen estes recursos e as visitas a adegas e conserveiras “permitirán ao visitante vivir unha experiencia diferencial e de alto valor engadido”, explicaron os alcaldes, engadindo que nos vindeiros días comezará a execución do subministro e instalación de bicicletas e cargadores eléctricos e as obras do Museo da Conserva en Boiro. Asemade o próximo día 22 acaba o período de presentación de ofertas para a execución do Espazo Enogastronómico en Rianxo e nas seguintes semanas licitarase a posta en valor do Barrio dos Cataláns na Pobra do Caramiñal, o Museo da Sangadura de Ribeira, a creación dun produto enogastronómico e un plan de comunicación.
José Carlos Vidal recalcou tamén que o gran valor engadido da Mancomunidade é “a cooperación entre os concellos que permite que os proxectos se executen de forma eficaz e eficiente”.
