A Policía Local de Rianxo informou que na quenda da tarde deste luns 12 de xaneiro procedeu á identificación dun varón como presunto autor de tres delitos leves contra o patrimonio por furtos, que foron perpetrados de forma continuada en diversos establecementos do núcleo urbano de Rianxo.
Segundo explicaron, os feitos aconteceron de xeito sucesivo durante a franxa vespertina do día deste luns, xerando unha rápida resposta policial dos axentes de servizo.
No marco da intervención realizada, os axentes cando localizaron ao sospeitoso, atoparon entre as súas pertenzas os obxectos procedentes dun dos furtos, séndolle aprehendidos.
Instruíronse os correspondentes atestados policiais polos feitos acontecidos, nos que se identifica plenamente ao presunto autor dos ilícitos penais, ao cal, segundo fixeron saber os axentes, “cónstanlle numerosos antecedentes por feitos similares e outros roubos”.
As dilixencias policiais realizadas son remitidas polo procedemento oportuno ao Tribunal de Instancia de Padrón en funcións de garda.
Procedeuse tamén á entrega en calidade de depósito dos efectos recuperados ao seu lexítimo propietario.
