As inmediacións do campo de fútbol Agra da Filgueira de Louro serán o escenario este próximo domingo, 25 de xaneiro, da BTT de Muros (3 horas de resistencia), unha das probas da Copa Galicia deste ano. Trátase dunha proba organizada polo Club Ciclista de Muros en colaboración co Concello.
O concelleiro de Deportes de Muros, Damián Torea, destaca “o éxito da proba do ano pasado, que estou convencido de que se repetirá este domingo”, convidando á veciñanza “a asistir ao campionato para desfrutar da espectacularidade da BTT”.
A alcaldesa de Muros, María Lago, considera que “esta proba en Louro serve para impulsar no noso concello o deporte ao aire libre, fomentando ademais o deporte feminino para todas as idades”.
Na presentación estiveron tamén José Romero, presidente do Club Ciclista de Muros, e Carlos Lestón, directivo do club.
Desde as 10:00 horas do domingo, haberá probas desde Cadete a Master 60 en categorías feminina e masculina.
Inscricións abertas ata mañá mércores, 21 de xaneiro, ás 23:59 horas en www.fgalegaciclismo.es
O Concello quere agradecer o traballo da Brigada de Obras municipal, Protección Civil de Muros, Policía Local, GES e Garda Civil de Muros.
