A Policía Nacional detivo na tarde deste mércores en Vilagarcía de Arousa a un médico como presunto autor dunha agresión sexual a unha muller nova, segundo confirmaron fontes policiais. Os feitos denunciados terían ocorrido nunha consulta dunha clínica situada no centro da localidade.
A detención produciuse tras a presentación dunha denuncia por parte da vítima. O investigado foi trasladado a dependencias policiais, onde foi interrogado, e posteriormente quedou en liberdade, á espera de ser citado pola autoridade xudicial.
A investigación permanece aberta e a Policía Nacional continúa a instruír dilixencias, sen descartar que poidan aparecer novas denuncias relacionadas cos feitos.
Pola súa banda, fontes do Tribunal Superior de Xustiza de Galicia (TSXG) confirmaron que o investigado aínda non compareceu en sede xudicial e que o xulgado correspondente está á espera de recibir o atestado policial para avanzar no procedemento.
