A agrupación Boiro Novo, a través seu concelleiro Xurxo Triñanes, emitiu un comunicado no que denuncia a tala de árbores perpetrada no parque da Cachada, coincidindo coa remodelación do edificio da Casa da Cultura. “Este mércores volvemos ser testemuñas dun novo atentado contra o patrimonio paisaxístico e medioambiental do noso concello, trala tala de máis dunha ducia de frondosas de gran porte, que foron suprimidas para facer oco á obra faraónica da nova Casa da Cultura”, criticaron.
Segundo engadiron, o Goberno local faltou á verdade xa que cando anunciaron o proxecto afirmaron que ían “integrar o inmóbel co entorno”, mesmo chegaron a difundir imaxes renderizadas do novo edificio xunto coas arbores, cando agora vemos que fan o contrario”.
E sinalan: “Estamos pois ante unha nova tala indiscriminada que se suma á da praza do Concello, ás do paseo marítimo de Barraña ou ás do Pazo de Goiáns,… Lonxe de integrar nada, as árbores son vistas por este Goberno como un estorbo e non coma un ben a conservar”.
Apuntan tamén que “as infraestruturas e os proxectos deben facerse priorizando o menor impacto ambiental posíbel adecuando a obra ao entorno e non ao revés. Así o fixemos na lexislatura pasada cando tivemos responsabilidades de goberno, deseñando actuacións tentando facer o mínimo impacto ambiental e respectando as arbores existentes. E cando, por motivos técnicos, non foi posíbel manter algunha arbore no mesmo lugar eliximos transplantar antes que talar como por exemplo no tramo de carril bici de A Negral”.
