O secretario xeral do PSdeG, José Ramón Gómez Besteiro, asegurou este venres 30 de xaneiro que o socialismo galego está a coordinar a súa acción política en todas as institucións para “defender Galicia cunha soa voz”, nun momento político clave xa en perspectiva municipal. Así o sinalou antes da celebración dunha reunión interparlamentaria dos e das socialistas galegos, concibida como “espazo de traballo para aliñar estratexias, prioridades e mensaxes desde o ámbito local ata o europeo”.
Besteiro subliñou que “esa coordinación é esencial para construír unha alternativa sólida e coherente, con continuidade entre o que se defende en Bruxelas, en Madrid e no Parlamento de Galicia, especialmente ante problemas que afectan directamente ao día a día da cidadanía”.
Besteiro afirmou que a sanidade galega “non ten un problema puntual nin conxuntural, senón un problema estrutural de recursos, de xestión e de liderado”. Unha realidade que, segundo explicou, “maniféstase nas listas de espera (360.000 persoas agardando por unha consulta, 50.000 por unha operación) na atención primaria saturada, na falta de profesionais e no esgotamento do persoal sanitario”..
Por iso,animou á cidadanía a participar na manifestación convocada para este domingo, coa previsión de que sexa masiva. “Non se trata dun conflito político, senón de defender un dereito básico: unha sanidade pública e de calidade. Iso concírnenos a todos”, afirmou.
O líder dos socialistas galegos vinculou directamente a situación da sanidade co financiamento e coas prioridades políticas do Goberno galego: “Para que a sanidade funcione fan falta recursos, pero tamén decisións e capacidade de xestión. E hoxe en Galicia non hai nin unha cousa nin a outra”, criticou, referíndose tamén ao memorando asinado entre a Xunta e a multinacional Altri, cuxo contido segue sen aclararse: “É lexítimo preguntarse en que se priorizan os cartos públicos cando a Xunta admite que asinou un memorando á marxe do control administrativo e se nega a dar explicacións”, advertiu. Segundo indicou, “falamos de posíbeis compromisos millonarios, con impacto territorial, ambiental e económico, adoptados sen transparencia. Non se pode crer que algo así se fixese sen coñecemento político ao máis alto nivel”, engadiu.
Por este motivo, reiterou a esixencia de explicacións e a solicitude dunha comisión de investigación no Parlamento de Galicia para esclarecer que se asinou, con que mandato político e con que consecuencias para Galicia. Adiantou que “o PSdeG contactará con outras formacións políticas para sacar adiante este órgano fiscalizador para saber toda a verdade”.
