Coñécese como o calote do fillo en apuros e, a pesar dos reiterados avisos da policía e das operacións que permitiron desartellar varias bandas, continúa a dar resultado. Os delincuentes están a empregar voces xeradas con intelixencia artificial para facerse pasar por fillos ou fillas das vítimas e abusar da súa boa vontade. O último caso coñecido produciuse en Vigo, onde unha muller foi estafada por un importe de 46.000 euros.
“Fanse pasar por un fillo ou filla e dinlle: ‘Papá, rompeume o móbil’, e pídenlle que urxentemente lles fagan unha transferencia bancaria”, explica Estela Otero, voceira da Policía Nacional da comisaría de Vigo-Redondela. Así foi como a vítima realizou varias transferencias e perdeu case 50.000 euros.
Os métodos evolucionaron e xa non se limitan ás mensaxes de texto. As novas tecnoloxías permiten imitar voces con gran precisión. En Santiago, unha muller recibiu unha chamada na que recoñeceu a voz do seu fillo, clonada mediante intelixencia artificial. Neste caso, a afectada conseguiu recuperar os 2.400 euros transferidos.
A policía advirte de que non só caen persoas maiores. Recentemente, unha moza de Santiago recibiu unha mensaxe dunha suposta amiga que lle solicitaba un bizum de 60 euros para coller un taxi, alegando que perdera o móbil e a carteira. Tratábase tamén dun engano que non chegou a denunciarse, como ocorre con frecuencia nas estafas de pequenas cantidades.
“Ante calquera dúbida, hai que contactar co número habitual dese familiar ou amigo para comprobar se realmente é el quen chama”, recomenda a axente Otero.
Recuperar o diñeiro non é o habitual, xa que en moitos casos as entidades bancarias consideran que a transferencia foi realizada voluntariamente. Por iso, a Policía Nacional insiste en desconfiar das urxencias, evitar actuar baixo presión e, ante a mínima sospeita, chamar ao 091.
