Arousa Neo comezou o ano en clave intensa: organizando dúas probas de trail de máxima relevancia en Outes e máis en Porto do Son (Trail Series).
A primeira das citas será o Trail de Outes, previsto para o vindeiro 25 de xaneiro, coa colaboración de CAO e con saída dende O Freixo (Centro Náutico). Haberá tres vertentes: curta (15 quilómetros de percorrido e 800 metros de desnivel), longa (21,5 quilómetros e 1.100 metros de desnivel) e modo andaina (15 quilómetros).
Ademais, o 22 de febreiro vaise celebrar en terras sonenses a edición 2026 do Xtosín Trail, un clásico da comarca do Barbanza neste deporte que reivindica a fermosura das nosas paisaxes e da nosa natureza. Será, en palabras da organización, “unha proba na que se combina a dureza do percorrido cunhas paisaxes espectaculares”
As persoas participantes poderán escoller entre dúas distancias: o trail longo de 21K e un desnivel de 980 metros ou o curto de 15K, cun desnivel de 750 metros. Ademais, tamén se realizará unha andaina de 15 quilómetros.
Organizan Arousa Neo, Sachacamiños e o Concello de Porto do Son.
A saída será o porto pesqueiro de Portosín.
As persoas interesadas xa poden formalizar a súa inscrición a través da web galitiming.
Lembrar que o prazo de inscricións das Trail Series remata este domingo 18 de xaneiro, segundo lembran nas redes dende Arousa Neo.
