O Concello de Noia recibiu aviso na tarde deste venres 16 de xaneiro dun novo aviso de vertido na ría, concretamente un vertido de líquido cor verde aparecido na ría, a carón do malecón de Gasset. Ata alí desprazáronse o alcalde, o tenente de alcalde e o concelleiro de Medio Ambiente, xunto con efectivos da Policía Local, GES e SEPRONA, e recolléronse mostras para a súa análise.
Confirmaron que até o de agora “todo apunta a que se trata dun po inocuo, empregado entre outros en situacións de salvamento marítimo ou roturas de fontanería”.
E engadiron: “Queremos recordar que o Concello mantén un compromiso firme co saneamento e coa eliminación dos puntos de vertido, un traballo no que se leva meses avanzando e no que se redobrarán esforzos ao longo de 2026”.
O BNG tamén emitiu un comunicado nas redes sociais sobre a incidencia, sinalando que “este tipo de imaxes, que nos aterrorizan, teñen que acabar, por iso nos vindeiros orzamentos de Noia, nos que o BNG xogará un papel clave, haberá un investimento en saneamento sen precedentes”.
Segundo engadiron, “queremos que a polución da nosa ría sexa un triste recordo, e tampouco pararemos de traballar para que a Xunta poña da súa parte dunha vez por todas neste obxectivo que debería ser a prioridade para todas as administracións”.
