A Deputación da Coruña e o Concello de Boiro, ao abeiro da edición 2025 da campaña provincial Ser e Sentir e como colofón da mesma, programaron para este 23 de xaneiro o espectáculo Vicio sempre houbo, un monólogo para público adulto previsto para as 20.00 horas deste venres no Centro Social de Abanqueiro. A entrada será de balde.
Como dixemos, forma parte da edición 2025 da campaña Ser e Sentir da Área de Igualdade de Xénero da Deputación da Coruña, unha iniciativa desenvolvida ao longo dos últimos meses co obxectivo de promover a igualdade, o respecto á diversidade afectivo-sexual e de identidade de xénero.
Durante esta edición, Ser e sentir impulsou accións dirixidas a concellos, entidades sociais, centros educativos e público xeral, consolidándose como un espazo de diálogo, visibilidade e reflexión arredor dos dereitos, as liberdades e a dignidade das persoas.
En Vicio houbo sempre Atenea García presenta historias de vida recollidas a mulleres maiores de 80 anos arredor do desexo, do pracer e da sexualidade, chegará a dúas localidades coruñesas.
Trátase dunha divertida proposta de narración oral para público adulto onde Atenea García reflicte historias de desexo, pracer, sexualidade… A primeira conversa naceu cunha frase: “Vicio houbo sempre, gracias a Dios!”, e logo seguíronlle outras tantas onde as mulleres foron contándolle unha chea de cousas supostamente prohibidas.
A xira de Vicio houbo sempre rematará ao día seguinte, 24 de xaneiro, en Val do Dubra.
