O cemiterio de Boisaca, en Santiago, acolleu na mañá deste luns 5 de xaneiro a tradicional ofrenda floral en lembranza do escritor e dramaturgo Ramón María del Valle-Inclán, organizada polo Concello de Santiago con motivo do 90 aniversario do seu pasamento, acontecido o 5 de xaneiro de 1936 na capital galega.
No acto participaron representantes do Concello de Santiago, da Xunta de Galicia, do Museo Valle-Inclán, así como dos concellos da Pobra do Caramiñal e de Vilanova de Arousa, ademais de familiares do autor, entidades culturais e membros da Corporación municipal.
Durante a homenaxe, a alcaldesa de Santiago de Compostela, Goretti Sanmartín Rei, destacou a estreita relación de Valle-Inclán coa cidade e o valor da súa obra literaria, subliñando “a súa capacidade para combinar espírito crítico, humor e innovación estética”. A rexedora sinalou que “Compostela foi para o autor un espazo de creación e inspiración, unha cidade que quedou profundamente vencellada á súa traxectoria vital e artística”.
Sanmartín lembrou que se cumpren 90 anos do falecemento de Valle-Inclán nun ano especialmente dedicado á memoria, e puxo en valor o compromiso do Concello coa recuperación e dignificación da memoria histórica a través de iniciativas agrupadas baixo as marcas Compostela é Memoria e As mil marías. Seguindo este fío, a alcaldesa destacou diferentes actuacións impulsadas polo Concello para preservar a memoria democrática e cultural da cidade, así como para recoñecer figuras senlleiras da historia galega vencelladas a Compostela.
No acto tamén interveu o conselleiro de Cultura, Lingua e Xuventude, José López Campos, acompañado polo director xeral de Cultura, Anxo M. Lorenzo, quen sinalou que “sempre debemos ter presente a pegada que deixaron na nosa identidade persoeiros como os que hoxe homenaxeamos”, en referencia non só á homenaxe a Valle-Inclán senón tamén á memoria de Isaac Díaz Pardo, do que se cumpren 14 anos do seu pasamento. “É por iso”, puntualizou, que “ademais de lembrar datas sinaladas con actos como este, tamén celebramos o legado das nosas figuras históricas con amplas programacións como o Ano Castelao que rematamos en decembro ou o Ano Oteriano que comezamos neste 2026”.
Polo Concello da Pobra participaron o alcalde, José Carlos Vidal, e a concelleira de Cultura, Patricia Lojo, ademais do director do Museo Valle-Inclán, Antonio González Millán. Tamén se sumou o Concello de Cambados, con Lino González-Roma, concelleiro de cultura desa outra vila valleinclaniana.
