A Asociación Boirense de Empresas (ABE) pon en marcha a campaña de promoción comercial A Contra o Reloxo do Comercio Local, coincidindo coa celebración da Carreira de Traiñeiras Contra o Reloxo organizada polo Club de Remo Cabo da Cruz, co obxectivo de “vincular o deporte coa actividade económica local e incentivar as compras no comercio de proximidade”.
A campaña desenvolverase do 19 ao 31 de xaneiro, período no que as persoas consumidoras poderán participar nun sorteo de agasallos realizando compras nos establecementos asociados á ABE e rexistrando os seus tíckets na web da entidade. O sorteo celebrarase o luns 2 de febreiro.
Entre os premios destacan dous packs do Club de Remo Cabo da Cruz, que inclúen dúas camisolas co lema Cabo somos nós, un vale de compra de 20 euros para a tenda do club e un carné de socio para a tempada 2026, así como dous packs da ABE compostos por unha toalla de praia, un termo, unha neveira friameira e unha camiseta Somos Boiro.
Con esta iniciativa, a ABE pretende “apoiar e dinamizar o comercio local, reforzar a conexión entre deporte e economía de proximidade e dar visibilidade tanto ao tecido empresarial de Boiro como ao Club de Remo Cabo da Cruz, facilitando ademais a participación a través dun sistema dixital sinxelo e accesible”.
Trátase dunha actividade co-financiada pola Xunta de Galicia.
