O Concello de Ribeira premia a creatividade da cidadanía cos concursos de embelecemento de Nadal
O Concello de Ribeira vén de convocar unha nova edición dos concursos de embelecemento de Nadal, que este ano manterán as tres modalidades habituais: decoración de fachadas, balcóns e xardíns; decoración de comercios e escaparates; e ornamentación de locais hostaleiros.
O obxectivo desta iniciativa é reforzar o ambiente festivo nas rúas do municipio e impulsar a participación cidadá e empresarial nestas datas, favorecendo ao mesmo tempo a dinamización do comercio de proximidade. O Concello anima así á veciñanza a engalanar o exterior das súas vivendas e convida a hostalería e ao comercio a sumarse coas decoracións dos seus establecementos.
A concelleira de Cultura, Ana Barreiro, explicou que estes concursos pretenden “involucrar de xeito activo aos nosos veciños para engalanar o exterior das súas casas, complementando a decoración luminosa municipal”. Pola súa banda, a edil de Promoción Económica, Carmen Pérez, destacou “a importancia de contar coa implicación da hostalería e do comercio, tanto do centro urbano como do rural, para contribuír ao espírito propio destas datas”.
Premios por categorías
Na modalidade de decoración de fachadas, balcóns e xardíns, entregaranse nove premios, un por cada parroquia, consistentes en cestas con produtos de Nadal valoradas en 200 euros.
Para as categorías de comercios e escaparates e de locais hostaleiros establécense catro premios, dous por modalidade:
- Primeiros premios: cestas por valor de 250 euros.
- Segundos premios: cestas por valor de 160 euros.
As decoracións deberán permanecer expostas desde o 17 de decembro de 2025 ata o 6 de xaneiro de 2026, ambas datas incluídas.
Inscricións abertas ata o 17 de decembro
As persoas ou establecementos interesados poden inscribirse ata o 17 de decembro, enviando a ficha de participación e un máximo de tres fotografías das decoracións.
- Fachadas, balcóns e xardíns: inscrición en culturaefestexos@ribeira.gal. Poderase enviar tamén un vídeo opcional de ata 15 segundos.
- Comercio e hostalaría: inscrición en comercio@ribeira.gal ou mediante WhatsApp no 686 587 000.
O ditame do xurado darase a coñecer na última semana de decembro.
