O Nadal vai comezar en Rianxo, oficialmente, este sábado 6 de decembro, dende a praza de Castelao estendéndose a todos os barrios da vila e máis ás parroquias. As festas arrincarán co prendido das luces de Nadal e cunha serie de actividades festeiras que darán comezo ás 17.30 horas co espectáculo infantil Rogelio, un pallaso en recuperación.
Un pouco máis tarde, ás 18.30 horas no mesmo emprazamento (a praza de Castelao) dará comezo un concerto de Cherry Sweet.
O prendido das luces de Nadal está programado para as 20.00 horas. Acompañarase da proxección dun espectáculo de luz e son.
Ás 20.30 horas chegará o momento que estaban a agardar nenos e tamén maiores: a chegada de Papá Noel e Mamá Noel.
Será, en palabras do Concello, “unha gran cita de diversión para os máis pequenos e pequenas da casa, con moita música e algunha visita moi especial”.
