Jesús Alonso, a título póstumo, Isaac Maceiras, Teresa Villaverde e Santos Maneiro foron os distinguidos
A Xunta Directiva do Partido Popular da provincia da Coruña, encabezada polo seu presidente, Diego Calvo, celebrou hoxe un acto de recoñecemento e homenaxe aos alcaldes e alcaldesas da formación que, tras unha dilatada traxectoria á fronte dos seus concellos, xa se atopan retirados da vida política activa. Dous dos homenaxeados recibiron este recoñecemento a título póstumo.
O encontro, marcado pola emoción e o agradecemento, contou coa participación do secretario xeral do PP, Miguel Tellado; da secretaria xeral do PPdeG, Paula Prado; e do secretario xeral do partido na provincia, Evaristo Ben. Durante o acto, Diego Calvo puxo en valor a achega decisiva de todas as persoas homenaxeadas ao municipalismo e ao fortalecemento do proxecto do Partido Popular na provincia da Coruña.
“Grazas de corazón a todos eles polos anos de traballo, esforzo e dedicación ao servizo público. O seu compromiso co partido e cos seus veciños foi exemplar, exercendo sempre unha política próxima, responsable e centrada en mellorar a calidade de vida dos seus municipios”, subliñou Calvo.
Desde María Teresa Villaverde e José Luis Pérez Añón, os últimos en abandonar a primeira liña política, ata os xa falecidos José Blanco Pazos ou Jesús Alonso Fernández, todos eles representaron, segundo o presidente provincial, os valores fundamentais do Partido Popular. “Son exemplo de vocación de servizo, honestidade, proximidade e defensa do interese xeral. O seu labor diario, moitas veces silencioso, contribuíu de maneira decisiva ao progreso social, económico e humano dos seus concellos, deixando unha pegada fonda en cada localidade”, afirmou.
Diego Calvo destacou tamén a lealdade destes alcaldes e alcaldesas ao proxecto político do Partido Popular, así como a súa capacidade para antepoñer sempre as necesidades dos veciños a calquera interese persoal. Neste sentido, asegurou que a súa experiencia e exemplo “continúan sendo unha referencia imprescindible para quen hoxe asumen responsabilidades públicas e para as novas xeracións de cargos e afiliados”.
Con esta homenaxe, a dirección provincial do PP quixo non só recoñecer traxectorias políticas destacadas, senón tamén agradecer unha forma de entender a política baseada no compromiso, a proximidade e a responsabilidade, valores que, segundo indicaron, seguen plenamente vixentes e forman parte da identidade do partido na provincia da Coruña.
A mirada posta no futuro
Pola súa banda, a secretaria xeral do PPdeG, Paula Prado, animou aos cargos municipais do partido a continuar traballando coa vista posta nas eleccións municipais de 2027, así como nas futuras citas xerais e autonómicas, co obxectivo de acadar “resultados históricos”. Prado apelou á unidade interna do partido e destacou que esta cohesión o diferencia doutras formacións políticas.
Alcaldes e alcaldesas homenaxeados
Foron recoñecidos María Teresa Villaverde (Lousame, 2012-2025), José Luis Pérez Añón (Laxe, 2019-2024), Ignacio Codesido Barreiro (Touro, 2003-2019), Ana Rodríguez Montero (Cerdido, 2006-2015), José Manuel Santos Maneiro (Mazaricos, 1995-2015), Juan Juncal (Ferrol, 2003-2007), Isaac Maceiras Rivas (A Pobra do Caramiñal, 1999-2015), Juan José Rey Maceira (Negreira, 2013-2015), Antonio Pérez Insúa (Noia, 2003-2007), Eugenio Neira García (Oroso, 1995-2007), así como, a título póstumo, José Blanco Pazos (Negreira, 1995-2007) e Jesús Alonso Fernández (Boiro, 1995-2003)
