O Concello de Rianxo, no marco do Laboratorio Ecosocial do Barbanza, organiza este sábado 13 de decembro de 2025 unha xornada de visitas técnicas a tres comunidades de montes que están a impulsar modelos pioneiros de xestión forestal e transición enerxética en Galicia. O programa inclúe dúas saídas, ás 09:00 h desde a Praza do Concello de Rianxo e ás 09:30 h desde a estación de autobuses de Santiago de Compostela, cun regreso ás 18:00 h. A actividade é gratuíta e está aberta a todas as persoas interesadas. Para participar é necesario inscribirse cubrindo o formulario habilitado ou escribindo a info@barbanzaecosocial.org.
Comunidades a visitar
Comunidade de Montes de Buchabade (Ponte Caldelas). Referente na transición enerxética en Galicia, impulsa proxectos que integran monte, auga e enerxía para construír un territorio máis resiliente fronte ao cambio climático.
Comunidade de Montes de A Reigosa (Ponte Caldelas). Desenvolve iniciativas de enerxía comunitaria, entre elas o seu horto solar, orientadas a reducir custos eléctricos e garantir que os beneficios das renovábeis permanezan no territorio.
Comunidade de Montes de Antas (A Lama). Transformou un monte antes abandonado nun espazo produtivo e ben xestionado. Hoxe conta con 500 hectáreas ordenadas, que producen ao 90%, combinando usos forestais e gandeiros nun modelo recoñecido polo seu impacto ambiental e social.
Laboratorio Ecosocial do Barbanza
O Laboratorio Ecosocial do Barbanza conta co apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. Coordinado pola Fundación RIA, o Laboratorio Ecosocial do Barbanza é un proxecto dedicado a promover a transición cara á sustentabilidade ambiental e a fortalecer a resiliencia na xestión territorial dos montes do Barbanza.
