As nenas e nenos participantes no campamento Tempo de Nadal 2025-26, incluído no programa Outes Concilia, despediron o ano cunha actividade de educación ambiental ao contribuír ao proxecto de renaturalización do río Tins ao seu paso pola Serra de Outes (ReNatur_Outes).
A xornada tivo lugar o venres 26 e estivo guiada polas monitoras do campamento e por técnicas da Fundación Montescola. Durante a actividade, as crianzas plantaron carballos na beira do río e construíron un hibernáculo de réptiles, unha infraestrutura pensada para ofrecer refuxio ás poboacións presentes no ecosistema fluvial do Tins.
Ao longo da mañá, as participantes tamén aprenderon a identificar diferentes especies de réptiles e insectos da zona, como escarabellos, mediante a visita a un dos refuxios de insectos instalados nas proximidades do río. Ademais, colaboraron na localización e eliminación dunha das manchas de Tradescantia fluminensis, unha especie exótica invasora presente na contorna fluvial, contribuíndo así ás accións de restauración dos hábitats de ribeira.
O proxecto ReNatur_Outes, liderado polo Concello de Outes, conta coa participación de investigadores das tres universidades públicas galegas, da Fundación Montescola e do Centro de Estudos Eurorrexionais Galicia–Norte de Portugal (CEER). A iniciativa recibe tamén o apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea a través dos fondos NextGenerationEU.
Entre os principais eixos do proxecto atópanse a recuperación do bosque de ribeira, o control de especies exóticas invasoras —como distintas variedades de acacia (Acacia dealbata e Acacia melanoxylon), Tradescantia fluminensis ou plantas do xénero Crocosmia—, a limpeza de residuos na contorna fluvial e a sensibilización ambiental da cidadanía.
Estas accións complétanse con actividades de voluntariado, formativas e divulgativas, así como con sesións de gobernanza cidadá, co obxectivo de fomentar a participación activa da veciñanza de Outes e xerar un compromiso social duradeiro coa conservación da biodiversidade máis alá da propia vida do proxecto.
