O grupo parlamentario do BNG acolleu o pasado xoves unha reunión co persoal de limpeza do Hospital do Barbanza co obxectivo de buscar iniciativas que poñan fin á discriminación laboral e salarial que padece o colectivo. A agrupación explicou que o encontro celebrouse “trala solicitude formal das traballadoras, motivada pola falta de resposta da Consellería de Sanidade e da Dirección Xeral do SERGAS aos numerosos escritos remitidos polo colectivo”. Isto obrigou á CIG a dirixirse ós grupos políticos con representación no Parlamento galego para poñer fin á invisibilización á que somete este colectivo o SERGAS. Segundo denuncian, “esta ausencia de contestación evidencia a falta de compromiso da Administración para avanzar na equiparación total das condicións laborais, salariais e sociais co persoal de limpeza doutros hospitais do SERGAS”.
Á reunión asistiron as deputadas e deputado nacionalistas Rosana Pérez, Iria Carreira e Óscar Ínsua, que se comprometeron a trasladar esta situación á Comisión de Sanidade do Parlamento galego mediante unha serie de preguntas co fin de esixir solucións inmediatas e explicacións á Consellería de Sanidade. O BNG reiterou o seu apoio ao persoal e denunciou “a impasividade da Consellería de Sanidade ante unha situación tan grave que afecta a un servizo esencial para o funcionamento do hospital”.
Os nacionalistas esixen á xerencia do Hospital do Barbanza que “rectifique a súa actitude” e “abra un proceso de diálogo co persoal e así poder garantir condicións laborais dignas e equiparábeis ás do resto da área sanitaria”.
O persoal de limpeza leva mobilizándose desde o pasado mes de novembro para reclamar a equiparación das súas condicións laborais coas do persoal de limpeza dos hospitais de referencia. O BNG explica que “esta problemática esténdese aos centros hospitalarios de Ribeira, Vilagarcía e Cee, onde se lles aplica o respectivo convenio provincial de limpeza e non se lles recoñece a equiparación co grupo E do SERGAS; Desta maneira, a situación tradúcese en condicións inferiores en materia retributiva, de complementos salariais, permisos, descansos e xornada laboral”.
A asemblea de persoal anunciou que continuará mobilizándose ata “que a Dirección Xeral do SERGAS convoque unha reunión” e abra unha mesa de negociación real que dea resposta ás súas demandas. As mobilizacións produciranse diante dos centros hospitalarios os días 17, 22, 23, 29 e 30 de decembro, con paros de dúas horas por quenda. Ademais, anuncian paros indefinidos a xornada completa a partir do 7 de xaneiro de 2026.
