O Bloque Nacionalista Galego de Outes emitiu un comunicado no que critica ao Goberno local do PP de Fran Calo por “recortar en obras e mantemento para pagar desfases noutras áreas como festas e deportes”. Engadiron que isto contrasta cos argumentos dos populares cando fixeron prosperar a moción censura, intre no que “avogaron por sacar dunha suposta cova a brigada de obras e agora resulta que recortaron, no último pleno ordinario, as partidas de obras para pagar os desfases en varias áreas: nomeadamente en arrendamentos de festas (carpas, maquinaria…) e deportes”, sinalou o BNG, criticando que “se modificase o orzamento, por desfasarse, pouco máis de medio ano despois de aprobalo”.
Critican que nas contas mantense unha previsión de incremento de ingresos que “non é realista” e “non vén respaldada por informes específicos, como no caso do ICIO, no que falta un informe da área de Urbanismo, tal e como destaca o informe de intervención”. O BNG di que o orzamento foi “sacado ás presas sen a documentación necesaria para sacar a foto, pero a última modificación de crédito que fixo o goberno encabezado por Fran Calo certifica que estamos diante duns novos orzamentos que son fume e que non garanten melloras nas políticas públicas do Concello de Outes”.
E engaden: “É evidente que de pouco vale aumentar sobre o papel as partidas de obras cando se aproba o orzamento cando, a finais deste mesmo ano, demostraron que non fixeron absolutamente nada nesta área xa que tiñan excedentes de 80.000 € que tiveron que mover para pagar os desfases de festas e deportes”.
Para o BNG, o Concello demostrou “unha gran incapacidade para afrontar os retos e darlle solución ás necesidades máis imperiosas de mantemento das infraestruturas e camiños municipais”.
Conclúen lembrando que o Concello “segue a pagar, a amortizar, unha débeda asumida coa Deputación durante o Goberno do Partido Popular no mandato 2015-19, a única débeda que ten o noso Concello”. Este ano, indican, “inclúese unha partida en pasivos financeiros para este fin de 124.739,22 € que serán restados do plan de obras e servizos do ano que vén”.
