O alumnado participante no Programa Integrado de Emprego 2025/2026 dos concellos de Boiro, Rianxo e A Pobra estase a formar en peixaría. O alcalde, José Ramón Romero, visitou ao alumnado no Centro de Formación, Innovación e Emprendemento de Espiñeira durante a formación.
O Programa Integrado de Emprego 2025/2026 está destinado a 100 persoas desempregadas da comarca que, durante 12 meses, están a recibir formación específica acorde aos sectores produtivos da zona; así como xornadas destinadas á mellora das habilidades de empegabilidade e inserción laboral.
Este programa basease nunha metodoloxía innovadora onde as persoas usuarias son protagonistas da súa propia transición profesional con formación innovadora, emprego de tecnoloxías e plataformas dixitais, colaboración directa con empresas e adaptación do programa a necesidades locais e sectores da comarca.
O novo curso enfocouse cunha renovación case total das actividades formativas co obxectivo de adaptalas ás novas necesidades das empresas demandantes. Deste xeito, o programa implica formacións como acompañamento en transporte escolar, organización de almacén, operacións básicas de caixa, técnicas e procedementos de limpeza en aloxamentos, xestión de recepción, cociña, pastelería, peixería, charcutería… Ademais de formación adaptada ao manexo de novas tecnoloxías como por exemplo como manexar a suite ofimática Office, como crear páxinas web, como empregar a sinatura dixital, ou como tirar proveito da ferramenta ChatGPT e da intelixencia artificial.
Para levar a cabo este Programa Integrado de Emprego durante o curso 2025-2026, os concellos reciben unha subvención da Consellería de Emprego, Comercio e Emigración por importe de 220.000,00 euros.
