O Concello de Muros celebrou unha nova edición da súa Gala do Deporte, un acto no que se puxo en valor o talento, o esforzo e a traxectoria das deportistas, deportistas, clubs e persoas vencelladas ao ámbito deportivo local. A alcaldesa, María Lago, destacou durante o evento que o deporte é sinónimo de “saúde, igualdade de oportunidades e cohesión social”, subliñando ademais o papel fundamental do deporte de base e local “para fomentar o sentimento de pertenza e fortalecer a comunidade”.
Na categoría de deportista feminina, o recoñecemento foi para Alejandra Formoso, referente do atletismo, mentres que o galardón a deportista masculino recaeu en Víctor Ramos, tamén atleta, quen recibiu ademais o premio Especial Veciñanza, polo seu compromiso e vinculación co municipio.
O premio ao mellor club deportivo foi para o URME de Remo, pola súa traxectoria, traballo formativo e polos éxitos acadados. Na categoría de promesas deportivas, os galardóns recaeron en Eva Formoso (trail running) e Jesús García (trail running), destacando o seu proxección e futuro no deporte.
O recoñecemento ao mellor evento deportivo foi para o Trail Cova da Bruxa, unha proba xa consolidada no calendario deportivo local e comarcal, que combina deporte, natureza e promoción do territorio.
Durante a gala entregáronse tamén mencións especiais a Félix Rebollido, polo seu labor vencellado ao Trail Cova da Bruxa; a Ricardo Rodríguez, pola súa ampla traxectoria ligada ao fútbol en Muros; e a Juan Manuel París, fundador do Club de Remo Muros, polo seu papel clave no desenvolvemento deste deporte no municipio.
Así mesmo, o Concello concedeu un recoñecemento especial a Eva Val, remeira, como mostra de agradecemento pola súa dedicación, exemplo deportivo e representación de Muros no ámbito do remo.
A Gala do Deporte converteuse nunha xornada de celebración e orgullo colectivo, reafirmando a aposta do Concello de Muros polo deporte como ferramenta de benestar, igualdade e cohesión social.
