AGADEA ALZHÉIMER puxo en marcha este Nadal 2025 unha campaña solidaria na que máis de 100 comercios e organismos locais das áreas de Santiago de Compostela, A Estrada e Barbanza se converten en protagonistas dun Nadal comprometido coa memoria, a inclusión e a solidariedade.
Ao longo destas semanas, persoas usuarias dos centros de AGADEA están a visitar os establecementos colaboradores para facerlles entrega dun agasallo de Nadal elaborado de maneira artesanal, froito das actividades terapéuticas que se desenvolven na entidade. Trátase dun xesto simbólico cargado de significado, co que se busca visibilizar a enfermidade de alzhéimer, sensibilizar á sociedade e reforzar os lazos entre o comercio de proximidade, as familias e a comunidade.
A campaña destaca tamén polo seu importante valor terapéutico e social, xa que fomenta a estimulación cognitiva, a participación activa e a socialización das persoas usuarias, ademais de fortalecer o seu sentimento de pertenza. Ao mesmo tempo, pon en valor o papel do comercio local como axente fundamental dunha sociedade máis humana, próxima e solidaria.
Desde AGADEA ALZHÉIMER salientan a implicación e a boa acollida por parte dos establecementos participantes, agradecendo a súa colaboración e compromiso cunha iniciativa que converte o Nadal nun tempo de encontro, conciencia social e apoio ás persoas que conviven coa enfermidade e ás súas familias.
